شاهد جمال بخيت ورائعته ( مش باقي مني)
شاهد
https://www.youtube.com/watch?v=SJzCEXmMNmYإقرأ
مش باقى منى
غير شوية ضى فى عنيا
انا حديهملك
وأمشى بصبرى فى الملكوت
يمكن فى نورهم تلمحى خطوة
تفرق معاكى بين الحياة والموت
مش باقى منى
غير شوية نبض فى عروقى
خدى وعيشى
و أفتحيلى تابوت
افرح بريحة ورد فرعونى
وربنا فى عونى
اذا دخلت الجنة ولا النار
حاشتاق الى ضحكتك
وقعدتى فى الدار
و القهوة متحوجة من طيبة العطار
فى كل يوم الصبح اشرب حليب قبطى
وفى النهار
و المسا
امسك ستار الكعبة لو سبتى
و اثبت اذا هربتى
أهديكى عمرى
و حسى
وجوارحى
أهديكى جرحى
هو الى باقى فى دنيتى
لما خلص فرحى
مش باقى منى
غير شوية لحم فى كتافى
بلاش يتبعتروا
فى البحر
بلاش يتحرقوا
فى قطر الصعيد فى العيد
بلاش لكلاب الصيد تناوليهم
خدى الى باقى من الأمل فيهم
وابنيلى من عضمهم
فى كل حارة مقام
وزورينى
مرة وحيدة
لو كل الفين عام
ألم الجراح يتلم
مش باقى منى
غيرشوية دم
متلوثين بالهم
مريّن وفيهم سم
كانوا زمان شربات
والنكتة سكرهم
شربتهم الخفافيش
فى قلب اوكارهم
مش باقى منى
غيرشوية دم
مقدرشى
اسقيكى مواجعهم
وبرضو مقدرشى
ارميكى و ابيعهم
يمكن فى مرة تعوزى
تطلبينى شهيد
حاحتاج يوميها الدم
يمضى على شهادتى
مش باقى منى
غير شوية قوة
فى ارادتى
على شوية شعر
من خطى
حاسبى عليهم
وانتى بتخطى
وانتى فى صبح الدلال
بتعطرى شطى
مش باقى منى
غير شوية ضى فى عنيا
انا مش عايزهم
لو كنت يوم هالمحك وانتى بتوطى
فى معركة مفيهاش
لاطيارات
ولاجيش
وانتى فى طابور العيش
بتبوسى ايد الزمن
يناولك لقمة
من حقك المشروع
مش باقى منى
غير .. شهقة
شهقة فى نفس مقطوع
بفتحلها سكة
ما بين رئة وضلوع
ما بين غبار و دموع
وانا تحت حجر المقطم
فى الدويقة بموت
انا والعطش و الجوع
يئن تحت التراب
وانا صوتى مش مسموع
يا حلمنا الموجوع
من المرور ممنوع
مستنى لما يمر
موكب سلاطينك
مش باقى منى
غير شوية رحمة من طينك
على شوية صبر من دينك
مش باقى منى
غير حبة غنا تايهين
فى الضلمة
مش لاقيين
حس الفواعلية
ولاصوت مراكبى عفى
فوق المعدية
ولا صوت بناتى العذارى
فى كل صبحية
والغنوة امنية
يما نفسى اقابل حبيبى
وانا ع زراعية
صوتك و صوتهم غاب
وانا تحت حجر المقطم
باموت لوحدية
الليلة
راحت عيونى
تطل عالبستان
وجناين الرمان
رجعتلى توصف
عناد الغل و الدخان
وسحابة سودة تضلل
على الغنى الغلبان
رجعتلى توصف
هبوب الموت
على الألوان
رجعتلى توصف
خيال الذل
فى موائد الرحمن
مش باقى منى
غير شوية كفر بشروقك
وانا منبع الأيمان
مش باقى منى
غير شوية ضى
وعنيا مش قادرة تلمحنى
فى وحدتى محنى
خايف اموت من الخوف
والضعف يفضحنى
السجن عشش فى قلبى
وماشى فى شوارعك
نفس الى باعنى انا
بالرخيص بايعك
أشيل حمولى انا
ولا حاشيل حملك؟
ما عدت املك شئ
فيكى ولا فيا
ولا قيراط ولابيت
ولانسمة صافية
تلاغى النيل بحرية
مش باقى منى
غير شوية حب
جارحنى
ولاباقى منى
غير شوية ضى
فى عنيا
حمل
http://www.voobys.com/watch?v=SJzCEXmMNmY[b]
الرئيسية 
موضوع: [b]شاهد جمال بخيت ورائعته ( مش باقي مني)[/b]